Елордалық № 77 мектеп-лицейде “Педагог мәртебесі туралы” заңға байланысты мәселелер талқыланды. Бұл туралы Нұр-Сұлтан әкімдігінің баспасөз қызметі хабарлайды.
Астана қаласы әкімінің орынбасары Бахтияр Мәкен қатысқан дөңгелек үстел барысында Нұр-Сұлтан білім беру ұйымдарының басшылары мен педагогтары “Педагог мәртебесі туралы” заңның арқасында мұғалімдер мен тәрбиешілердің құқықтары теңестірілгенін атап өтті.
Сонымен қатар, пікірталасқа қатысушылар осы жылдан бастап Қазақстан мұғалімдерінің жалақысы 25%-ға көтерілетіндігін, ал тәрбиешілерге педагогикалық шеберлігі үшін 30-дан 50%-ға дейін қосымша ақы енгізілгенін айтты.
Өз кезегінде Нұр-Сұлтан қаласы басшысының орынбасары Президент Тоқаев қол қойған “Педагог мәртебесі туралы” заң педагогикалық қоғамның және еліміздің жекелеген педагогтарының беделін нығайтуға бағытталғанына назар аударды.
“Педагогтардың жағдайын жақсартатын барлық нормалар бекітілді, бұл мамандық жастар мен өскелең ұрпақ үшін тартымды болады. Қазіргі уақытта кадрлардың жетіспейтінін ескерсек, бұл өзекті мәселе. Бұл заң жастарды ынталандыруға мүмкіндік береді”, – деді Мәкен.
Сурет: tengrinews.kz
