Нұр-Сұлтан қаласы білім басқармасы басшысының орынбасары Дулат Шоғанбайға қатысты бюджет қаражатын жымқыру фактісі бойынша сотқа дейінгі тергеу басталды. Бұл туралы ОКҚ брифингінде ҚР Сыбайлас жемқорлыққа қарсы іс-қимыл агенттігі төрағасының бірінші орынбасары Олжас Бектенов мәлімдеді, деп хабарлайды KAZAKHSTAN TODAY.
“Сотқа дейінгі бұл тергеу Нұр-Сұлтан қаласының білім басқармасы жабдықты жоғары бағамен сатып алу фактісі бойынша тіркелді. Тиісті сараптамалық қорытынды бар. Бірақ одан арғы нәтижелер туралы айтуға әлі ерте, тергеу жүргізілуде”, – деп Бектеновтың айтқанын келтірді Kazpravda.
“Білім басқармасы басшысының орынбасары Дулат Шоғанбай жұмыста. Иә, оған қатысты сотқа дейінгі тергеу тіркелді. Дегенмен, ҚР Қаржы министрлігі Ішкі мемлекеттік аудит департаментінің және сыбайлас жемқорлыққа қарсы іс-қимыл агенттігінің Нұр-Сұлтан қаласы бойынша департаментінің 15 наурыздағы аудиторлық есебіне сәйкес компьютерлердің/ноутбуктердің бағасын белгілеу және сыбайлас жемқорлық тәуекелдерінің болуы мәселесі бойынша бұзушылықтар анықталған жоқ”, – деп түсіндірді Нұр-Сұлтан әкімдігінде.
Бұған дейін ҚР Сыбайлас жемқорлыққа қарсы іс-қимыл агенттігі еліміздің 5 өңірінде білім басқармаларының лауазымды тұлғаларына қатысты 2020 жылы бағдарлама бойынша компьютерлер, планшеттер мен ноутбуктер сатып алуға бөлінген бюджет қаражатын жымқыру фактілері бойынша 6 қылмыстық іс тергеліп жатқанын айтқан болатын.
