Қазақстан астанасында инженерлік желілер мен ғимараттарды цифрлау жұмыстары басталды. Осы жобаның арқасында қаланың 3D моделі мен инвестициялық картасы жасалады. Бұл туралы қала әкімдігінің баспасөз қызметі хабарлады.
«Ел басшылығы мемлекеттік қызметтерді цифрландыру мен автоматтандыруға ерекше көңіл бөледі. Инженерлік желілерді цифрлау бірнеше міндеттерді шешуге мүмкіндік береді: 3D және BIM технологияларды қолдану арқылы желідегі жүктемені көруге болады, онда қуаттылықты арттыру қажет болады», — деді Астана әкімі Алтай Көлгінов Astana Innovations өкілдерімен кездесуде.
Ол Нұр-сұлтан сандық бас жоспарын жүзеге асыру қала құрылысы моделін жобалау мен болжам жасауға көмектесетінін атап өтті.
Осы жобаның арқасында елордалық билік пен инвесторларға мектептер, ауруханалар мен балабақшалар сияқты әлеуметтік нысандардың жай-күйін қадағалау оңай болмақ, сондай-ақ ол жобаланып жатқан және салынған жол желілерінің жай-күйін қадағалауға мүмкіндік береді.
Жер телімдері де сандық болады. Бұл бос жер учаскелерін, оларды ұтымды пайдалану мен алып қоюды қадағалауға болатын база құруға мүмкіндік береді.
«Бас жоспардың кеңістіктік үш өлшемді макетін құру қала мен жеке объектілердің 3D голограммасын көруге, қалалық инфрақұрылымның табиғи және техногендік жағдайлары мен мінез — құлқын модельдеуге (кәріз, апат, дауыл және т.б.), қала құрылысының тығыздығын жобалауға мүмкіндік береді», — делінген әкімдік хабарламасында.
Сурет: sputniknews.kz
