Нұр-Сұлтанда жыл басынан бері кәсіпкерлер карантиндік шектеулерді бұзғаны үшін жалпы сомасы 12 276 370 теңге айыппұл төледі, деп Kazpravda.kz хабарлайды.
Нұр-сұлтан қаласы әкімдігінің ресми сайтының хабарлауынша, елордада қала әкімінің орынбасары Бақтияр Мәкеннің төрағалығымен коронавирустық инфекцияның пайда болуы мен таралуына жол бермеу жөніндегі комиссияның кезекті отырысы өтті.
Ол жағдайды тұрақтандырудың алғашқы белгілері пайда болғанын, алайда қала тұрғындары мен қонақтары, сондай-ақ кәсіпкерлік субъектілері тарапынан карантин режимінің талаптарын қатаң орындау талап етілетінін атап өтті.
Елорданың бас санитарлық дәрігері Сархат Бейсенованың айтуынша, әрбір аудандық әкімдікте 8 мониторингтік топ құрылған. 2021 жылғы 19-24 наурыз аралығында мониторингтік топтар 198 рейд жүргізді, оның барысында 756 объект қамтылды, шектеу карантиндік шаралары сақталмайтын 40 объект анықталды.
“2021 жылдың 1 қаңтарынан 19 наурызына дейін аудандық полиция басқармаларынан 319 материал келіп түсті. 21 172 830 теңге сомасына 95 әкімшілік айыппұл салынды, 12 276 370 теңге сомасына 72 айыппұл қысқартылған тәртіппен төленді”, – деп Сархат Бейсенова хабарлады.
Келіп түскен материалдардың 59-ы қараусыз қалдырылды (сурки -, бейнематериалдар жоқ), 19-ы назарға алынды, 21 материал бойынша бұзушылық фактісі расталмады, 2 материал бойынша тарту мерзімі аяқталды (2020 жылғы қазан, қараша).
Мамандандырылған ауданаралық әкімшілік сотқа бұзушылықтарды жою туралы Нұсқаманы орындамайтын 47 “қасақана бұзушыға” қатысты 54 материал жіберілді. Бүгінгі таңда елорданың 13 кәсіпкерлік нысанының қызметі тоқтатылды.
