Нұр-Сұлтанда “Аграрлық несие корпорациясының” бұрынғы атқарушы директоры Азамат Қамшымбаевқа үкім шығарылды. Істі елорданың қылмыстық істер жөніндегі мамандандырылған ауданаралық соты қарады. Бұл туралы Қазақстанның сыбайлас жемқорлыққа қарсы күрес ведомствосының өкілдері айтты.
Іс материалдарынан Қамшымбаев кепілдегі элеваторды сатып алу кезінде ауыл шаруашылығы тауарын өндірушіге тиесілі 200 мың доллар ұрлады деп айыпталды.
Бұл іске қатысы бар тағы бір тұлға Ақтөбе облыстық мәслихатының депутаты Асқар Болатов болды. Ол ұрлық жасауға жәрдемдесті деп айыпталды.
Сот шешімі бойынша Қамшымбаев пен Болатов кінәлі деп танылды. Бұрынғы атқарушы директор 10 жылға, ал депутат 5 жылға бас бостандығынан айырылды.
Бұған дейін Қазақстанда Білім Министрлігі басшысының бұрынғы көмекшісі Нұрлан Күдеров сотталғаны хабарланған. Ол қызметін өз мақсатына пайдалану арқылы алаяқтық жолымен бюджет қаражатын жымқырды деген күдікке ілінді. Мұндай әрекеттері үшін ол 5 жылға бас бостандығын шектеу жазасын алды.
