Биылғы шақыру маусымында санитарлық-гигиеналық талаптарға ерекше көңіл бөлінеді, деп әкімдіктің ресми сайты хабарлайды.
Бүгін Нұр-сұлтан жиын пунктінде күзгі әскерге шақыру науқаны басталды.
Осы күзде Нұр-Сұлтаннан келген 800-ден астам әскерге шақырылушы Қарулы Күштер, Ұлттық қауіпсіздік комитетінің Шекара қызметі және Қазақстан Республикасының Ұлттық ұланы қатарында әскери қызмет атқару үшін еліміздің түкпір-түкпіріне аттанады.
«Күзгі шақыру қыркүйек пен желтоқсан аралығында өткізіледі. Жас сарбаздардың алғашқы командалары келесі аптадан бастап әскери бөлімдерге барады.
Армия үнемі жаңартылып отырады, жабдықтар технологиялық жағынан жетілдірілуде, сондықтан бізде мерзімді әскери қызметшілерге қойылатын үлкен талаптар бар », — деді Нұр-Сұлтан қалалық қорғаныс істері жөніндегі басқарма штабының бастығы полковник Айдын Сағынбеков.
Оның айтуынша, биылғы шақыру маусымында санитарлық-гигиеналық нормаларға ерекше көңіл бөлінеді.
«Әскерге шақырылушылар медициналық комиссиядан өту кезінде, сондай-ақ әскери командаларды қалыптастыру кезінде әлеуметтік қашықтықтар мен пандемияның таралуына жол бермеу бойынша барлық шаралар сақталатын болады. Профилактикалық іс-шаралар көктемгі шақыру кезінде де өткізілді. Тәжірибе мен дағдымыз бар», — деді Айдын Сағынбеков.
Жалпы алғанда, шақыру медициналық комиссиялары арқылы 18-ден 27 жасқа дейінгі 9 мыңға жуық жігіт пен жасөспірімдерді куәландыру жоспарлануда.
Сурет: astana.gov.kz
