Нұр-Сұлтан тұрғындарын карантин шараларын қатаң сақтауға шақырды, бұл туралы қала әкімдігінің сайтында айтылған.
Биліктің хабарлауынша, соңғы аптада елордада коронавирус ауруы, алдыңғы аптаға қарағанда, 76 пайызға жоғары, яғни 100 мың тұрғынға шаққандағы қарқынды көрсеткіш 106,96 құрайды. Репродуктивті саны – 1,506. Эпидемиологиялық жағдайы бойынша Елорда 10 наурыздан бастап “қызыл” аймақта. “Нұр-Сұлтан қаласының санитарлық-эпидемиологиялық бақылау департаменті карантиндік шараларды қатаң сақтауды ұсынады: бетперде режимі; адамдар көп жиналатын орындарға бармау (естелік іс-шаралар, туған күндер, мерейтойлар, шығарып салу, құдалық, үйлену тойлары, беташар және басқа да іс-шаралар); әлеуметтік қашықтық; қолды сабынмен жиі жуу немесе антисептикпен зарарсыздандыру.
Қаладағы коронавирус инфекциясы бойынша эпидемиологиялық жағдайды ескере отырып, өзіңіздің және жақындарыңыздың денсаулығына жауапкершілікпен қарауды сұраймыз!”, — делінген хабарламада. Айта кетсек, өткен тәулікте Қазақстанда COVID-19 ауруының 1088 жағдайы анықталды, оның 380-і Алматыда, 152-і Нұр-Сұлтанда. Жақында Қасым-Жомарт Тоқаев Владимир Путиннен Қазақстанға «Спутник V» вакцинасын қосымша жеткізу туралы сұрады.
