Алматыда Халықаралық ақпараттық технологиялар университетінің бұрынғы ректоры Дамир Шыныбековке қатысты ашылған қылмыстық істі қарау бойынша сот отырысы өтті. Бұл іспен Бостандық аудандық соты айналысты, деп хабарлайды «ҚазАқпарат» ақпарат ресурсы.
Сотталушылар арасында осы ЖОО-ның экс-бухгалтері Жанайым Спабекова да болды, ол ректормен бірге 1,7 миллиард теңге сомасында бюджет қаражатын жымқырды деп айыпталды.
Сот отырысына дейін Спабекова Шыныбековпен бірге 2013-2018 жылдар аралығында бюджеттен ақша ұрлағанын мойындады. Оның айтуынша, 414 миллион теңгеден астам ақша ұрлаған.
Сот шешімі бойынша бұрынғы ректор мен есепші кінәлі деп танылып, мүлкі тәркіленіп, 8 жылға бас бостандығынан айырылды.
Бұған дейін Ақтөбе облысы бойынша Экономикалық тергеу департаментінің қызметкерлері Ақтөбе құрылыс бөлімі мектеп құрылысына бөлінген 20 миллион теңгеден астам бюджет қаражатын жымқырды деп күдікке ілінгені хабарланған болатын.
Аталған факті бойынша сотқа дейінгі тергеу амалдары жүргізілуде. Сонымен қатар, Ақтөбе мемлекеттік органы шенеуніктерінің ұрлыққа қатыстылығы тексерілуде.
Сурет: sputniknews.kz
