Мемлекет басшысының төрағалығымен “Астана” халықаралық қаржы орталығының ғимаратында реформалар жөніндегі Жоғары Кеңестің төртінші отырысы өтті.
Ашық пікірталас форматында өткен іс-шара барысында шетелдік инвесторлар кеңесін жаңғырту жөніндегі жұмыс және инвестициялар тарту жөніндегі жүйелі шаралар туралы Премьер-Министрдің орынбасары – Сыртқы істер министрі Мұхтар Тілеуберді баяндады. Премьер-Министрдің орынбасары Роман Скляр шетелдік инвесторлар үшін мұнай-газ саласының бәсекеге қабілеттілігі мен инвестициялық тартымдылығын арттыру бойынша жүйелі шаралар туралы хабарлады. Қазақстан Президентінің штаттан тыс кеңесшісі Сэр Сума Чакрабарти макроэкономикалық тұрақтылыққа қол жеткізуге бағытталған экономикалық өсу мен реформалар моделі туралы өзінің көзқарасын ұсынды. Стратегиялық жоспарлау және реформалар агенттігінің төрағасы Қайрат Келімбетов өз сөзінде BigData қолдана отырып, ұлттық статистиканы қалыптастыру процестерінің реинжинирингі тұжырымдамасын ұсынды. Премьер-Министрдің бірінші орынбасары Әлихан Смайылов кәсіпкерлік субъектілерін қолдау жөніндегі жедел шаралардың жаңа пакетін әзірлеу туралы хабардар етті.
Сонымен қатар, Джордж Вашингтон университетінің профессоры, “Growth Dialogue” басқарушы директоры Дэнни Лейпцигер, жаһандық даму орталығының президенті Масуд Ахмед, “MIT Sloan” менеджмент мектебінің профессоры Атанасиос Орфанидис Қазақстанның экономикалық дамуы туралы өз баяндамаларын онлайн-режимде жасады.
Қатысушылардың баяндамалаарын тыңдаған соң, Президент күн тәртібіндегі мәселелерге және реформалар стратегиясын одан әрі әзірлеу перспективаларына егжей-тегжейлі тоқталды.
Әр сөйлеушінің сөзі бойынша белсенді пікірталастар өтті, олардың қорытындысы бойынша Қасым-Жомарт Тоқаев ұсынылған бастамаларды жалпы мақұлдап, оларды іске асыру жөнінде нақты тапсырмалар берді.
Сурет: akorda.kz
