ҚР Премьер-Министрі Асқар Мамин жұмыс сапары барысында Қызылорда облысының Байқоңыр қаласының әлеуметтік-экономикалық дамуымен, сондай-ақ ғарыш саласындағы бірлескен қазақстандық-ресейлік жобалардың іске асырылуымен танысты, деп хабарлады zakon.kz, Премьер-Министрдің сайтына сілтеме жасай отырып.
Үкімет басшысына қаланы газдандыру және сумен жабдықтау, туристік инфрақұрылымды дамыту, сондай-ақ Байқоңыр қаласында “Байқоңыр” АЭА құру жөніндегі жұмыстардың барысы туралы баяндалды. “Союз МС-18” басқарылатын кемесінің ұшырылуын және оның халықаралық ғарыш станциясымен түйісуін бірлесіп бақылағаннан кейін, Үкімет басшысы “Роскосмос” ғарыш қызметі жөніндегі мемлекеттік корпорацияның бас директоры Дмитрий Рогозинмен ғарыш саласындағы қазақстан-ресей ынтымақтастығының өзекті мәселелерін талқылады.
Премьер-Министр адамның ғарышқа алғашқы ұшуының 60 жылдығына арналған конференцияның пленарлық отырысына қатысты.
Үкімет басшысы ҚР Президенті Қасым-Жомарт Тоқаевтың іс-шараға қатысушыларға арнаған құттықтау сөзін оқыды.
“Міне, 65 жыл бойы әлемдегі ең ірі ғарыш айлағы болып келген Байқоңыр ғарыш айлағынан 150 ғарышкер кең байтақ әлемді игерді. Олардың қатарында қазақстандық ғарышкерлер Тоқтар Әубәкіров, Талғат Мұсабаев және Айдын Айымбетов бар. Қазақстан мен Ресейдің одан әрі белсенді және жемісті ынтымақтастығы ғарыштық зерттеулер мен басқарылатын ұшу саласындағы бірлескен жобалар мен бағдарламаларды іске асыруға ықпал ететініне сенімдімін”, – деді Асқар Мамин.
