Елорданың орталық көшелерінің бірінің жүру бөлігінде жол белгілерін кескіндеу жүйесі орнатылмақ. Бұл тәжірибені Қазақстанның барлық ірі қалаларында тарату жоспарланып отыр. Бұл туралы ҚР Премьер-министрі Асқар Мамин мәлімдеді, деп хабарлайды “ҚазАқпарат” ХАА.
“Нұр-Сұлтан қаласының Қабанбай батыр даңғылы бойындағы реттелмейтін жаяу жүргіншілер өтетін жолда пилоттық жоба іске асырылуда (Астаналық цирк ғимараты ауданының жүру бөлігінде жол белгілерін кескіндеу жүйесі орнатылған). Бұл жүйе жыл мезгілі мен климаттық жағдайларға қарамастан, түнгі уақытта жаяу жүргіншілер өтетін аймақ пен жаяу жүргіншілердің көрінуін қамтамасыз етуге, сондай-ақ жүргізушілердің назарын шоғырландыруға мүмкіндік береді, бұл жүйенің басты артықшылығы болып табылады”, – деп жазды Асқар Мамин депутаттық сауалға берген жауабында.
Пилоттық жобаның нәтижесі бойынша, оларды Қазақстанның барлық ірі қалаларында орнатуды жалғастыру жоспарлануда.
“Жол қозғалысын қауіпсіз ұйымдастыруды қамтамасыз ету шеңберінде тұрақты негізде халықаралық озық тәжірибе енгізілуде. Сонымен, бірқатар облыстарда жаяу жүргіншілер “Ақылды” өткелдері орнатылды, олар арнайы датчиктердің көмегімен жол учаскесін автоматты түрде жарықтандырады. “Зебрадағы” жаяу жүргіншілер түнгі уақытта және көріну жеткіліксіз болған жағдайында жүргізушілерге айқын көрінеді (мұндай жаяу жүргіншілер өткелдері Сарыағаш, Атырау, Талдықорған және Павлодар қалаларында жұмыс істейді)”, — деп толықтырды Премьер-министр.
