ҚР Премьер-Министрі Асқар Мамин гранттар санын арттыру жоспарлары туралы айтты, деп хабарлайды “ҚазАқпарат” ХАА тілшісі.
“Талантты жастардың кетуін қысқарту мақсатында шетелдік университеттердің филиалдарын ашу жоспарланып отыр. Отандық 20 жетекші ЖОО өңірлердің өсу нүктелеріне айналады. Назарбаев Университетінің тәжірибесі бойынша инновациялар мен жаңа технологияларды дамытумен айналысатын екі озық ЖОО құрылатын болады”, — деді Асқар мамин Үкімет отырысында.
Сонымен қатар, оның айтуынша, жоғары білімнің қолжетімділігін арттыру үшін 2025 жылға дейін гранттар саны 50%-ға артады. “Жыл сайын жас ғалымдарға 1000 грант бөлінеді, ал 500 қазақстандық ғалым әлемнің танымал ғылыми орталықтарында тағылымдамадан өте алады.
Мемлекет басшысының тапсырмасы бойынша ағымдағы жылдың сәуір айында үздіксіз білім беру тұжырымдамасы қабылданады. Білім және ғылым министрлігі білім беру саласындағы ұлттық жобаларды әзірлеуде Елбасының, мемлекет басшысының барлық тапсырмаларын, “Нұр Отан” партиясының бағдарламасын іске асыруды қамтамасыз етуі қажет”, — деп атап өтті Премьер-Министр. Ол алға қойылған мақсаттарға қол жеткізу үшін күнделікті көп жұмыс қажет екенін атап өтті. “Әкімдердің жеке жауапкершілігіне назар аударамын, өйткені “Нұр Отан” партиясы бағдарламасының жол картасы тармақтарының уақтылы орындалуы жергілікті жерлердегі сапалы жұмысқа байланысты”, — деп түйіндеді Үкімет басшысы.
