Қазақстанның тұңғыш Президенті Нұрсұлтан Назарбаев Қазақстан Ұлттық ғылым академиясының президенті Мұрат Жұрыновты қабылдады. Бұл туралы Ақорданың баспасөз қызметі хабарлады.
Мұрат Жұрынов Нұрсұлтан Назарбаевқа Ұлттық Ғылым академиясының қазіргі қызметі туралы баяндады. Сонымен қатар, Елбасы ғылым саласындағы халықаралық ынтымақтастықты дамыту бойынша қабылданып жатқан шаралар туралы хабардар болды.
“Біз халықаралық альянстарға кіру бойынша жұмыс жүргізіп жатырмыз. Келісім-шарттар жасалады, соның негізінде біздің жас ғалымдар серіктестерден тағылымдамадан өту мүмкіндігіне ие болады”, – деді Жұрынов.
Сондай-ақ, еліміздің тұңғыш Президентіне Қазақстанның Ұлттық Ғылым академиясының Белдеу мен Жол халықаралық ғылыми ұйымдарының Альянсы аясындағы жұмысы туралы хабарлады.
Өткен жылы Пекинде ғылыми ұйымдардың ең ірі альянсы құрылды. Біз де сол Альянстың бір бөлімі болдық. Осылайша, біздің ғалымдар түрлі бағыттар бойынша мегажобалармен жұмыс істеуге қосымша мүмкіндік алды”, – деді Мұрат Жұрынов.
