Қазақстанның Тұңғыш Президенті Нұрсұлтан Назарбаев Түркі кеңесінің саммитінде сөйлеген сөзінде Өзбекстан басшысы Шавкат Мирзиеевті және бүкіл өзбек халқын Түркітілдес мемлекеттердің ынтымақтастық кеңесіне ресми түрде кіруімен құттықтады.
“Өзбекстанның кеңеске кіруі – бұл тарихи, сонымен қатар, бүкіл түркі тілдес қоғамдастық үшін көптен күткен оқиға”, – деді Назарбаев.
Саммит барысында Елбасы Венгрия астанасында Түркі кеңесі өкілдігінің ашылуының маңыздылығын атап өтті, сондай-ақ түркі тілдес мемлекеттердің ынтымақтастық кеңесіне төрағалық ету кезеңіндегі Қырғызстанның жетістіктерін жоғары бағалады.
Нұрсұлтан Назарбаев Түркия президенті Режеп Ердоғанға Түркі кеңесінің құрметті төрағасы мәртебесін бергені үшін алғыс айтты.
“Мен делегацияның барлық басшыларына осы бастаманы қолдағаны үшін ризашылығымды білдіремін. Бұл жоғары мәртебе маған алдағы уақытта да біздің ортақ ұйымның жұмысына белсенді қатысуға мүмкіндік береді”, – деді Елбасы.
Саммитке қатысушылар алдында сөйлеген сөзінде еліміздің Тұңғыш Президенті түркітілдес мемлекеттердің ынтымақтастық кеңесінің құрылу тарихына назар аударды.
“Бірлескен жұмысымыздың мерейтойлық шебінде біз жақсы нәтижелерге қол жеткіздік. Біріншіден, жаһандық тұрғыдан да, өз ішімізде де біз ұйымның өзектілігі мен қажеттілігін дәлелдедік. Екіншіден, Кеңес құрамына Өзбекстан мен Венгрия кірді. Осылайша біз жылнаманың жаңа бетін аштық. Үшіншіден, біздің елдеріміз маңызды институционалдық архитектура қалыптастырды. Төртіншіден, ұйымның өңірлік және халықаралық деңгейде беделінің өсуі байқалады. Бесіншіден, біз Түркі әлемінің интеграциясы тұжырымдамасын қабылдадық”, – деді Тұңғыш Президент.
Сонымен қатар, Назарбаев Түркі кеңесін одан әрі дамытуға бағытталған екі бастама көтерді. Біріншісі – “Түркі көзқарасы-2040” бағдарламасын әзірлеу.
“Бұл құжатта түркі тілдес қоғамдастықтың ұзақ мерзімді мақсаттары мен оларға қол жеткізу жолдары көрініс табуы тиіс. Осының арқасында біз сыртқы саясат пен “жұмсақ күш” саясаты, сауда және транзит, туризм және инвестициялар, энергетика және “Жасыл экономика”, шағын және орта бизнес сияқты мемлекеттер үшін басым салалардағы өзара іс-қимылды нығайтуға айтарлықтай серпін береміз”, – деді Елбасы.
Түркі тілдес мемлекеттердің ынтымақтастық кеңесінің одан әрі дамуына ықпал ететін Назарбаевтың екінші бастамасы кеңес атауының өзгеруі болып табылады.
“Түркітілдес мемлекеттердің ынтымақтастық кеңесінің деңгейін ұйым деңгейіне дейін көтеру мүмкін деп санаймын. Осылайша, біздің құрылымымызды “Түркі мемлекеттерінің ұйымы” деп атауға болады”, – деп толықтырды Назарбаев.
Сурет: 24.kz
