ҚР Парламенті Сенатының бүгінгі отырысында Қазақстанның Тұңғыш Президенті Нұрсұлтан Назарбаевқа Құрметті сенатордың белгісі мен куәлігі тапсырылды.
Елбасына белгі мен куәлігін табыстай отырып, Сенат төрағасы Дариға Назарбаева:
“Бүгін Сенат тарихында тағы бір ерекше күн. Өткен Сенат отырысында депутаттар Нұрсұлтан Назарбаевқа “Құрметті Сенатор” мәртебесін беру туралы ұсынысты бірауыздан қабылдады. Аса кұрметті Нұрсұлтан Әбішұлы, Құрметті сенатор мәртебесін беру туралы шешім-бұл біздің мемлекеттілігіміздің іргетасын құрудағы сіздің еңбегіңіздің танылуы,бүкіл әлемде танылған елдің стратегиялық даму жолын анықтау. Екі палаталы Парламентті қалыптастыруда сіздің жасампаздық үлесіңіз бен кәсібилігіңіз үшін сенаторлардың сізге деген үлкен құрметінің белгісі”.
Естеріңізге сала кетейік, Президент Қасым-Жомарт Тоқаев бірінші сөзінде Нұрсұлтан Назарбаевқа Құрметті сенатор мәртебесін беру керектігін айтқан болатын. 30 мамыр күні Сенатта депутаттар тиісті шешім қабылдады.
