Мемлекетіміздің Тұңғыш Президенті Нұрсұлтан Назарбаев «Самұрық-Қазына» Ұлттық әл-ауқат қорының басшысы Ахметжан Есімовпен кездесті. Бұл туралы Елбасының баспасөз қызметі хабарлады.
Кездесу барысында Назарбаев коронавирустық инфекциядан туындаған дағдарыс Қордың барлық компанияларында көрініс тапқанын атап өтті.
Ахметжан Есімов өз кезегінде дағдарысқа қарамастан, Ұлттық әл-ауқат қорының компаниялар тобы жұмысшылар санын қысқартпағанын баяндады. Сонымен қатар, төраға барлық кәсіпорындар жұмысын жалғастырып жатқанын атап өтті.
Есімовтың баяндамасын тыңдаған соң, Тұңғыш Президент “Самұрық-Қазына” қоры COVID-19 індетіне қарсы күрес үдерісіне белсенді қатысуы тиіс екенін мәлімдеді.
Осыған байланысты Назарбаев Ұлттық әл-ауқат қорының ішкі резервтерінен Нұр-Сұлтан мен Алматыда екі медициналық орталық салуға қаражат бөлуді тапсырды.
Сонымен қатар, Елбасы бұл медициналық орталықтар Қазақстан Республикасының ғылыми-зерттеу әлеуетін нығайтуға арналатынын, бұл болашақ ұрпақты осындай қауіп-қатерден қорғауға мүмкіндік беретінін айтты.
Нұрсұлтан Назарбаев министрлер кабинеті оның жаңа медициналық орталықтар салу туралы бастамасын қолдайтынына сенім білдірді.
Сурет: elbasy.kz
