Тұңғыш Президент Нұрсұлтан Назарбаев Қазақстан халқы Ассамблеясы басшысының орынбасары Жансейіт Түймебаевпен кездесу өткізді. Бұл туралы Елбасының баспасөз қызметі хабарлайды.
Кездесу кезінде Тұңғыш Президентке Қазақстан халқы Ассамблеясының қызметі туралы ақпарат берілді. Сонымен қатар Түймебаев Елбасына ҚХА-ның одан арғы жұмысы туралы баяндады.
“Ассамблеяның міндеттері анықталды. XXVII сессияда қабылданған шешімдер бар. Президент Қасым-Жомарт Тоқаевтың Қазақстан халқына Жолдауының басым бағыттары айтылды. Өңірлік этномәдени бірлестіктерді жұмысқа тарта отырып, оларды жергілікті жерлерде ілгерілету мен түсіндіруді қамтамасыз ету маңызды. Барлық облыстарда тиісті жұмысты өткізу қажет”, – деді Елбасы.
Сонымен қатар, кездесу аясында Тұңғыш Президент Қазақстан халқы Ассамблеясының қызметін күшейтуге қатысты мәселелерге де назар аударды. Нұрсұлтан Назарбаев ҚХА халықаралық бағыттағы жұмысын жақсартуы тиіс деп есептейді.
“Сіздің тапсырмаларыңызды орындау үшін Ассамблея жұмысын жандандыру бойынша бірқатар шаралар қабылданды. Басты назар аймақтық аспектіге бағытталды. 2 ай ішінде 4,5 миллионнан астам адамды қамтыған, 2000-нан астам іс-шара өткізілді”, – деді Жансейіт Түймебаев.
Әңгіме соңында Нұрсұлтан Назарбаев Қазақстан халқы Ассамблеясы төрағасының орынбасарына ҚХА-ның алдағы қызметіне қатысты бірқатар тапсырмалар берді.
Сурет: Elbasy.kz
