Қазақстанның Тұңғыш Президенті Нұрсұлтан Назарбаев «Астана» халықаралық қаржы орталығына (АХҚО) жұмыс сапарымен келді. Бұл туралы Ақорданың баспасөз қызметі хабарлады.
Сапар барысында Нұрсұлтан Назарбаев АХҚО-ның құқықтық жүйесін жақсарту бойынша қабылданып жатқан шаралар туралы хабардар етілді.
Сондай-ақ Назарбаевқа АХҚО сотының, ағылшын құқығы академиясының, халықаралық төрелік орталықтың және АХҚО ахуалдық орталығының қызметі туралы баяндалды.
Сонымен қатар, Елбасы өзінің сапары аясында қаржы орталығы биржасының негізгі акционерлері және қатысушыларымен кездесу өткізіп,олардың баяндамаларын тыңдады.
«Жекешелендіру жоспарын іске асыру бойынша басталған жұмысты АХҚО биржасы арқылы жалғастыру қажет. Әрине, әлемдік конъюнктураны ескеру маңызды. Бұдан басқа, халықаралық қаржы орталықтарының АХҚО-ға деген сенімін нығайту керек. Ұлттық экономикаға тартылатын қаражаттың көлемі осыған байланысты», — деді Назарбаев.
Сонымен қатар, Елбасы экономика өсімінің жоғары қарқынын қамтамасыз етуге және еліміздің стратегиялық даму жоспары бойынша мақсаттарға қол жеткізуге ерекше назар аударды.
«Орталықты алдағы уақытта маңызды жұмыс күтіп тұр. Барлық серіктестермен өзара іс-қимылды жалғастыру маңызды. Мен АХҚО-ның жұмысын әр уақытта қолдаймын», — деді Нұрсұлтан Назарбаев.
