Экология, геология және табиғи ресурстар министрлігінің басшысы Мағзұм Мырзағалиев ведомство жанынан сараптамалық кеңес құру жоспарланғанын, оған барлық тілек білдірушілер шақырылатынын айтты. Бұл туралы ол өзінің Twitter әлеуметтік желісіндегі ресми парақшасында жазды.
” Өздеріңіз білетіндей экология, геология, су ресурстары, орман шаруашылығы мен жануарлар әлемі енді біздің министрлікте шоғырланған. Біз жоғарыда аталған барлық бағыттар бойынша сараптамалық кеңестер құруға бастамашылық етеміз, оған барлық ниет білдірушілерді: қоғамшылдарды, ҮЕҰ-ы, сарапшыларды, белсенді азаматтарды шақырамыз”, – деді Мырзағалиев.
Министр министрлікте туындаған сұрақтар мен мәселелерді кеңес сарапшыларымен бірлесіп шешетінін айтты.
“Біз өзекті мәселелерді талқылау үшін ашықпыз және қоғаммен бірлесіп шешу жолдарын іздестіруді көзедейміз. Барлықтарыңызды осы сараптамалық алаңдағы сындарлы диалогқа шақырамыз”, – деді ведомство басшысы.
