ҚР Премьер-Министрінің орынбасары Ералы Тоғжанов еңбекті қорғауды қамтамасыз ету саласында жүзеге асырылып жатқан шаралар туралы айтты, деп хабарлайды “ҚазАқпарат” ХАА.
“Бүгін 2019-2023 жылдарға арналған өндірістік жарақаттануды және еңбек жағдайлары зиянды жұмыс орындарын азайту жөніндегі жол картасы (Үкіметтің 2019 жылғы 26 маусымдағы № 441 қаулысымен бекітілген) іске асырылуда. Жол картасы жұмыс орындарында кәсіптік қауіп-қатерлерді, өндірістік жарақаттануды және зиянды жұмыс орындарын азайтуға, еңбек жағдайларында
мемлекеттік бақылауды қамтамасыз етуге бағытталған еңбек қауіпсіздігі және еңбекті қорғау саласындағы жұмыс берушілерге қойылатын талаптарды оңтайландыру жөніндегі шаралар кешенін көздейді. Қазіргі уақытта Жол картасына өзгерістер мен толықтырулар әзірленуде, олар зиянды еңбек жағдайлары бар жұмыстармен айналысатын қызметкерлердің әлеуметтік қорғалу деңгейін арттыруды, өндірісті басқару жүйесіндегі үздіксіз процесс болып табылатын қазіргі заманғы еңбекті қорғауды басқару жүйесін өндірістік кәсіпорындарда енгізуді көздейтін болады, оны енгізу және бақылау енді жұмыс берушінің міндеті болып табылады”, — деп жазды Ералы Тоғжанов депутаттық сауалға берген жауабында. Сонымен қатар, оның айтуынша, республика кәсіпорындарын “Vizion Zero” Халықаралық әлеуметтік қамсыздандыру қауымдастығының тұжырымдамасына (нөлдік жарақаттану) қосу бойынша ақпарат науқаны жалғасып жатыр. Бүгінгі таңда республиканың 216 кәсіпорны тұжырымдамаға қосылды. 2021 жылғы 1 қаңтардағы жағдай бойынша еліміздің 2796 кәсіпорны еңбек қауіпсіздігі және еңбекті қорғау стандарттарын енгізді. Республика кәсіпорындарында шарттық қатынастар шеңберінде қауіпсіз еңбек жағдайларын қамтамасыз ету бойынша тапсырыс берушіден мердігерге дейін сатылас бақылау енгізіледі. Бүгінгі таңда республиканың 48 кәсіпорнында бақылаудың сатылас моделі енгізілді. Көрсетілген іс-шараларды іске асыру нәтижесінде 2025 жылға қарай жиілік коэффициенті 1000 жұмысшыға шаққанда 0,20-ға дейін төмендету (2020 ж. – 0,23); зиянды еңбек жағдайларында жұмыс істейтін қызметкерлердің үлес салмағын 20%-ға дейін қысқарту (2019 ж. – 22,3%) күтілуде. Үкіметтің
қосымша мәліметі бойынша,
мемлекеттік бақылау нәтижелері анықталған еңбек заңнамасын бұзушылықтың шамамен 28,8%-ы еңбек қауіпсіздігі және еңбекті қорғау саласына келеді. 2020 жылдың қорытындысы бойынша мемлекеттік еңбек инспекторлары еңбек қауіпсіздігі және еңбекті қорғау саласында 2096 бұзушылықты анықтады. Мемлекеттік еңбек инспекторлары еңбекті қорғау талаптарын бұзу фактілері бойынша құқық қорғау органдарына 1234 материал жіберіп, олар бойынша 173 қылмыстық іс қозғалды. Анықталған бұзушылықтарды жойғанға дейін 207 лауазымды тұлға атқарып отырған лауазымынан босатылды, еңбекті қорғау талаптарын қамтамасыз ету, өндірістік жарақаттанудың алдын алу бойынша бірлескен іс-қимылдарды ұйымдастыру үшін кәсіпорындарда еңбек қауіпсіздігі және еңбекті қорғау бойынша 15 мыңнан астам өндірістік кеңестер құрылды.
