Қаржы нарығын реттеу және дамыту жөніндегі Қазақстан агенттігі азаматтар алған несие мерзімін кейінге қалдыру бойынша Қазақстанда жүргізіліп жатқан жұмыстар туралы айтты.
Агенттіктің ақпаратына қарағанда, бүгінгі күні екі миллионға жуық қазақстандықтың қарыздары кейінге қалдырылды, олардың жалпы сомасы 265,8 миллиард теңгені құрайды. Салыстыру үшін, бұл жеке тұлғалардың жалпы қарызының 34%-ы.
Сонымен қатар, агенттікте шағын және орта бизнес субъектілерінің несие бойынша мерзімін кейінге қалдыруды талап ете алатын қызмет түрлерінің тізбесі кеңейтілді.
Атап айтқанда, бұл тізімге сауда, өңдеу өнеркәсібі, көлік және қоймалау, тұру және тамақтану, ақпарат және байланыс, білім беру және денсаулық сақтау салалары қосылды.
Сондай-ақ, Қаржы нарығын реттеу және дамыту жөніндегі Қазақстандық агенттікте шағын және орта бизнестің қанша өкілі жеңілдетілген несие беру мемлекеттік бағдарламасы аясында жеңілдетілген несие алғаны айтылды.
Ведомствода хабарлағандай, бүгінгі таңда 1,3 мыңнан астам шағын және орта бизнес субъектілері жеңілдетілген несиелер алды, оның жалпы сомасы 187 миллиард теңгеден астам.
Бұған дейін хабарланғандай, Қазақстан президенті Қасым-Жомарт Тоқаевтың тапсырмасы бойынша елімізде шағын және орта бизнес өкілдері үшін жеңілдетілген несие беру бағдарламасы әзірленді. Оны жүзеге асыруға 600 миллиард теңге бағытталды.
Осы бағдарлама аясында шағын және орта бизнес субъектілеріне жеңілдетілген несиелер 12 айға дейінгі мерзімге 8%-дан аспайтын жылдық мөлшерлеме бойынша беріледі.
Сурет: zakon.kz
