Еуразиялық экономикалық комиссия кеңесі коронавирустық инфекцияның таралуының алдын алу және болдырмау үшін пайдаланылатын бірқатар тауарларды кедендік баждан босату мерзімін ұзарту туралы шешім қабылдады. Бұл туралы ЕЭК баспасөз қызметіне сілтеме жасай отыра, «ҚазАқпарат» ХАА
хабарлайды.
Тарифтік жеңілдік 2022 жылғы 30 маусымға дейін ұзартылады. Атап айтқанда, Еуразиялық экономикалық одақ аумағына дәрілік және дезинфекциялау құралдарын өндіру үшін кейбір қурамдас бөлшектер мен материалдар, медициналық препараттар, респираторлар, қорғаныш көзілдіріктері, резеңке қолғаптар, медициналық бұйымдар мен аппаратураны, сондай-ақ пациенттерді тасымалдауға арналған бокстар мен зембілдерді бажсыз жеткізуге болады. «Қазіргі уақытта әлемдегі эпидемиологиялық жағдай тұрақты емес, сондықтан Одаққа мүше мемлекеттер әмбебап тәсіл жоқ екенін назарға алып, COVID-19 одан әрі таралуы мүмкін, сондықтан жағдайдың дамуының түрлі нұсқаларына ден қоюға дайын болуға тиіс», — деп атап өтті осыған байланысты ЕЭК сауда жөніндегі министрі Андрей Слепнев. Шешім ресми жарияланған күнінен бастап күнтізбелік 10 күн өткен соң күшіне енеді және 2021 жылғы 1 сәуірден бастап туындаған құқықтық қатынастарда қолданылады.
