Тәуелсіз Мемлекеттер Достастығына мүше елдердің 2030 жылға дейінгі экономикалық даму жоспары, сондай-ақ 2025 жылға дейінгі Еуразиялық экономикалық интеграцияны дамытудың стратегиялық бағыттары Еуразиялық кеңістік елдері халықтарының мүддесінде жұмыс істеуі тиіс. Бұл туралы Еуразиялық экономикалық комиссия алқасының басшысы Михаил Мясникович ТМД-ның Халықаралық экономикалық форумы барысында мәлімдеді. Бұл туралы ЕЭК баспасөз қызметі хабарлады.
Мясниковичтің айтуынша, бұл құжаттар ЕАЭО-ға мүше елдердің экономикалық өсуінің баяулау мәселелерін шешуге ықпал етеді.
«Біз ТМД мен ЕАЭО үшін халықаралық еңбек бөлінісі мен әріптестік өзара тиімді ынтымақтастық басымдыққа ие болып қалатынына сенімдіміз. Осыған байланысты біздің интеграциялық бірлестіктеріміз: Беларусь пен Ресейдің одақтас мемлекеті, Еуразиялық экономикалық одақ және Тәуелсіз Мемлекеттер Достастығы тезірек экономикалық өсу үшін үлкен мақсаттар қояды», – деп комиссия басшысы хабарлады.
Оның пікірінше, құжаттар серіктес мемлекеттер мен олардың халықтарының игілігі үшін ТМД мен ЕАЭО-ның үйлестірілген іс-қимылдарын қамтамасыз ететін өзара толықтыратын бағдарламалар болып табылады.
Мясникович сонымен қатар, ең алдымен, жоғары технологиялық қайта өңдеу өндірістерін құруға басымдық беру және қолданыстағы өндірістік базаның бәсекеге қабілеттілігін арттыру арқылы еуразиялық өнеркәсіптік бизнесті қолдау қажеттілігін атап өтті.
Сурет: eurasiancommission.org
