Палата Спикері Нұрлан Нығматулиннің төрағалығымен Мәжіліс Бюросының отырысы өтіп, онда Палатаның алдағы жалпы отырысының күн тәртібінің жобасы әзірленді, деп zakon.kz. хабарлады.
Депутаттарға ратификациялық заң жобасын – талаптары ЕАЭО техникалық регламенттерінде белгіленбеген өнімнің ЕАЭО шеңберіндегі айналыс тәртібі және осындай өнімнің қауіпсіздігін қамтамасыз ету қағидалары туралы келісімді қарау ұсынылады.
Осы Келісімді қабылдау Одақ аумағында шығарылатын өнімнің қауіпсіздігін қамтамасыз ету бөлігінде Еуразиялық экономикалық одақ туралы шарттың ережелерін іске асыруға ықпал ететін болады.
Бұдан басқа, бюро отырысында жетінші сайланған Мәжіліс пен шет елдердің парламенттері арасындағы ынтымақтастық жөніндегі топтардың құрамы туралы мәселе қаралды.
