Мемлекет басшысының орынбасары Әлихан Смайылов Еуразиялық экономикалық комиссия Кеңесінің отырысына қатысты. Коронавирустық індетке байланысты ол бейнеконференцбайланыс арқылы өтті, деп хабарлайды “Хабар24”.
Отырыстың күн тәртібі 33 мәселені, оның ішінде Еуразиялық экономикалық одақта қызмет көрсетудің ортақ нарығын қалыптастыруға және одақтас елдердің өзара саудасына кедергі келтіретін тосқауылдарды жоюға байланысты мәселелерді қамтыды.
Бейнеконференция шеңберінде ЕЭК Кеңесінің мүшелері бірқатар шешімдер қабылдады. Олардың бірі бастапқы нысандардағы полиуретандардың жекелеген түрлеріне, эфироспирттер мен иелік заттарға қатысты баждарды нөлдеу болды. Бұл шара одақта 2023 жылға дейін қолданыста болады.
Сондай-ақ кеңес ЕАЭО-ның “алкоголь өнімінің қауіпсіздігі туралы” техникалық регламентінің күшіне ену мерзімін 2021 жылғы қаңтардан 2022 жылғы қаңтарға ауыстыру туралы шешім қабылдады. Ереженің кейбіріне өзгерістер енгізу қажеттілігіне байланысты кейінге қалдырылды.
Сонымен қатар, Кеңес мүшелері Иран өкілдерімен еркін сауда туралы толық форматты келісім жасасу туралы келіссөздерді бастады. Аталған құжатқа қол қою одақтас елдердің Иран Ислам Республикасымен тауар айналымы көлемінің ұлғаюына ықпал ететін болады.
Бүгінгі таңда ЕАЭО құрамына Қазақстан, Ресей, Қырғыз Республикасы, Армения және Беларусь кіреді.
Сурет: 24.kg
