Еліміздің президенті Қасым-Жомарт Тоқаев бір жағынан Еуразиялық экономикалық одақ пен оған қатысушы елдер, екінші жағынан Сербия арасындағы еркін сауда туралы келісімді ратификациялау туралы заңды мақұлдады. Бұл туралы республика басшысының баспасөз бөлімінде айтылды.
Сауда және интеграция министрлігінің басшысы Бақыт Сұлтанов бұған дейін Қазақстан, Беларусь және Ресей Федерациясы Сербия Республикасымен еркін сауда туралы екіжақты келісімдерді қолданатынын атап өткен болатын. Сонымен бірге, бұл құжат бес ел үшін Сербиямен ортақ сауда режимін белгілейді.
“Жаңа келісім бажсыз сауда көзделген тауарлар тізімін кеңейтеді. Мысалы, ЕАЭО елдері кедендік баж салығын төлемей Сербияға ірімшік, алкогольді ішімдіктер мен темекі жеткізе алады. Бұған дейін бұл өнімге импорттық кеден баждары салынатын”, – деп түсіндірді министр.
Сұлтановтың айтуынша, Еуразиялық экономикалық одақ ішкі нарықты қорғау үшін құс еті, қант, мата, алкогольді ішімдіктер, темекі және кейбір өнеркәсіптік тауарларды әкелуге баж салығын қолдануды сақтап қалды.
Сербия Республикасына отандық тауарлардың экспортын ұлғайту әлеуеті 250 миллион долларға жетеді, деп Қазақстан сауда министрлігінің басшысы атап өтті.
Сурет: kursiv.kz
