Еуразиялық экономикалық одақта ғылыми ұйымдарды интеграциялау тетігін әзірлеу ниеті бар. Мұндай ұсынысты ЕЭК Алқасының басшысы жанындағы ғылыми-техникалық кеңес төралқасының кезекті отырысына қатысушылар енгізді. Бұл туралы комиссияның баспасөз бөлімінде айтылды.
Отырыс барысында қатысушылар Еуразиялық экономикалық интеграцияны дамытудың 2025 жылға дейінгі Стратегиялық бағдарларын ғылыми сүйемелдеу мәселелерін, бүкіл өңірлік бірлестіктің экономикасын дамытуды қамтамасыз ете алатын озық жобаларды, сондай-ақ осы қызметке жастар мен жоғары оқу орындары ортасын тарту әлеуетін қарастырды.
ЕЭК Алқасының Төрағасы Михаил Мясниковичтің айтуынша, комиссияда ғылыми қоғамдастықпен ынтымақтастыққа үлкен көңіл бөлінеді.
«Біздің кеңес озық идеялар мен ынтымақтастық жобаларын жасай алады деп үміттенеміз. Біздің алдымызда барлық мемлекеттердің күш-жігерін біріктіру арқылы ЕАЭО-ның барынша өзін-өзі қамтамасыз етуіне жәрдемдесу міндеті тұр.
Бірлескен компаниялар құруға, экспортты ынталандыруға және импортты ұтымды қысқартуға бизнес-қоғамдастықты ынталандыру тетіктерін іске қосу қажет», — деді Мясникович.
Ол Одақтың өзіндік «цементтеуші орталықтарын» құру үшін ғылым мен оның интернационалдығын пайдалану, сондай-ақ бірлестікті тартымды интеграциялық ұйым ете отырып, ғылым арқылы еуразиялық интеграция идеясын кеңінен тарату ұсынысын айтты.
Отырысқа қатысушылар ЕАЭО-ға қатысушы елдердің ғылым саласындағы ынтымақтастығы туралы өз идеяларын да білдірді.
Сурет: провэд-медиа.рф
