Еуразиялық экономикалық комиссияның сауда бойынша министрі Вероника Никишина өткен жылдың мамыр айында қол қойылған ЕАЭО мен ҚХР арасындағы сауда-экономикалық ынтымақтастық туралы келісім сауда баждарын алып тастауды және төмендетуді қарастырмайды деп мәлімдеді.
Оның айтуынша, ЕАЭО қатысушы елдер Қытаймен еркін сауда аймағын іске қосуды жоспарлап отырған жоқ.
«Біздің елдеріміздің бизнесі әзірге Қытай Халық Республикасымен еркін сауда режиміндегі саудаға көшуге әзір емес, яғни кедендік баж салығын төмендету, нөлдеу туралы мәселені қозғауға дайын емес. Біздің ҚХР-мен келісім тарифтік емес саладағы сауданы жеңілдетуге және сыртқы экономикалық қызметтегі түрлі рәсімдерді жеңілдетуге қатысты», – деді Никишина.
Сондай-ақ ЕЭК сауда министрі Қытайдың ЕАЭО еркін сауда режиміне көшу мәселесін бірнеше жыл көтеріп келетінін хабарлады. ҚХР ЕАЭО нарығында қытай өнімі көп болуы үшін өз тауарларына баж салығын азайтуға белсенді түрде тырысуда.
Сурет: tobolinfo.kz
