Еуразиялық Даму Банкі мен Халықаралық авиация комитетінің өкілдері коронавирустық инфекция эпидемиясының салдарын еңсеру жөніндегі қызмет шеңберіндегі әріптестік туралы келісімге қол қойды. Құжатқа бірінші Еуразиялық конгресс кезінде қол қойылды. Бұл туралы ТАСС хабарлайды.
Келісім еларалық инфрақұрылымдық жобаларды жүзеге асырудағы, оның ішінде эпидемия салдарын еңсерудегі өзара іс-қимылға бағытталған.
Бұдан басқа, тараптар жаңа технологиялық өндірістер құру жөніндегі жобаларды бірлесіп іске асыруды жоспарлап отыр. Атап айтқанда, ұшқышсыз ұшу аппараттары, жасанды интеллект құралдарын енгізу, сондай-ақ көлік және логистикалық базаларды цифрландыру саласында.
Бірінші Еуразиялық Конгресті ЕАДБ ұйымдастырды.
Негізгі талқыланатын мәселелер Үлкен Еуразияны құру перспективалары, экономикалық интеграция мүмкіндіктерін бағалау, сондай-ақ ЕАЭО қатысушы елдері экономикаларының даму деңгейлерін теңестіру әлеуеті және тұрғындарының әл-ауқаты болды.
ЕАДБ ЕАЭО-ға мүше елдердің нарықтық экономикасының дамуына қолдау көрсету үшін 2006 жылғы қаңтарда Ресей Федерациясы мен Қазақстан құрған халықаралық даму банкі болып табылады.
Сурет: tass.ru
