Осы жылы ЕҚЫҰ Тұрақты Кеңесінің соңғы отырысы өтті, оған осы Ұйымның экономикалық-экологиялық комитетінің басшысы, біздің республикамыздың ЕҚЫҰ жанындағы Тұрақты Өкілі Қайрат Сарыбай қатысты. Бұл туралы Қазақстанның дипломатиялық ведомствосының баспасөз қызметі хабарлады.
Отырысқа қатысушылар алдында баяндама жасай отырып, Сарыбай биылғы жылы атқарылған жұмыстар туралы айтты. Оның айтуынша, 2019 жылы Комитет жұмысы аясында 4 тақырыптық отырыс өтті, онда сыбайлас жемқорлыққа қарсы әрекет ету, зілзала қауіп-қатерінің төмендеуі, сандық технологиялардың экономика мен қоғамға әсері, сондай-ақ тұрақты даму мәселелері қаралды.
Сонымен қатар, өз баяндамасында еліміздің өкілі Комитет жұмысы аясында басқаруды нығайту және өзара қатынасты қолдау, сондай-ақ энергетика қызметінің экологиялық әсерін жақсарту мәселелері талқыланған отырыстар ұйымдастырылғанын атап өтті.
Өз кезегінде, ЕҚЫҰ-ға қатысушы елдер делегацияларының өкілдері осы отырыста баяндама жасап, біздің республикамыздың экономикалық-экологиялық Комитетте төрағалық еткен жылдардағы қызметін жоғары бағалады.
