Келесі жылы біздің Республикамызда мемлекеттік ұйымдардағы әлеуметтік қызметкерлерінің еңбекақысы өседі. Бұл туралы Еңбек министрлігінде толығырақ айтылды.
Ведомство өкілдерінің айтуынша, жалақы әлеуметтік қызметкерлерге де, стационарлық және жартылай стационарлық үлгідегі медициналық-әлеуметтік мекемелер басшыларына да арттырылатын болады.
Мәселен, келесі жылы әлеуметтік қызметкерлердің жалақысы бір жарым есеге, 2022 жылы – ағымдағы мәннен 1,7 есеге, ал 2023 жылы – екі есеге ұлғайтылады. Бұл мақсатқа шамамен 95 миллиард теңге бюджет қаражаты қарастырылған.
Сонымен қатар, Қазақстанда медициналық-әлеуметтік мекемелердің әкімшілік және қосалқы қызметкерлеріне де еңбекақы төлеуді арттыру болжанып отыр.
Әлеуметтік қызметкерлердің жалақысын көтеруге қатысты мемлекетіміздің Еңбек министрі Біржан Нұрымбетов өз пікірін білдірді.
“Бұл жыл барлығымызға қиын болды. Біздің әлеуметтік қызметкерлер іс жүзінде ерекше контингентпен жұмыс істеп, мекемелерде өмір сүрді. Біз олардың еңбегін бағалаймыз және олардың маңыздылығын түсінеміз”, – деді Нұрымбетов.
Сонымен қатар, Еңбек министрлігінің басшысы жалақы мөлшерінің артуы әлеуметтік салаға жаңа мамандарды тартуға және республикадағы кадр тапшылығын жабуға мүмкіндік беретініне сенім білдірді.
