Еңбек және халықты әлеуметтік қорғау министрлігінің бірінші вице-министрі Ақмәди Сарбасов Еуразиялық экономикалық одақ елдерінде Қазақстан тұрғындары үшін зейнетақы беру шарттары туралы айтты. Бұл туралы zakon.kz ақпараттық басылым хабарлайды.
Оның айтуынша, көрші елдерге қоныс аударған республика тұрғындары ЕАЭО-ға қатысушы елдің аумағында жинақталған жұмыс өтілі бойынша зейнетақы алатын болады. Осы ақпарат негізінде, адам қай елде қызмет етсе, сол мемлекет зейнетақы төлейтін болады.
Зейнетақы мөлшері жұмыс беруші мемлекеттің заңдарымен айқындалатын болады. Мысалы, егер адам алдымен ЕАЭО елдерінің бірінде жұмыс істесе, ал кейін, одақ ішінде басқа елге қоныс аударса, ол бірінші мемлекетте тағайындалған зейнетақыны алатын болады.
Зейнетақы төлемдерін тағайындауға қатысты барлық мәселелер бойынша Қазақстан және ЕАЭО-ға қатысушы басқа елдердің азаматтары Бірыңғай жинақтаушы зейнетақы Қорына тікелей жүгіне алады.
“Егер, мысалы, ҚР азаматы РФ-да жұмыс істеген болса, онда РФ заңнамасы бойынша зейнетақы алу құқығы туындағанда, оған РФ-ға барып, зейнетақы тағайындауға өтініш пен тиісті құжаттарды тапсырудың қажеті жоқ. Тұратын елдің құзыретті органына, яғни БЖЗҚ-ға жүгіну жеткілікті”, – деп толықтырды министр.
Сурет: spectr.com.kz
