Бүгін ҚР еңбек және халықты әлеуметтік қорғау министрі Бердібек Сапарбаев Шымкентте атаулы әлеуметтік көмек төлеу мәселелері бойынша жұмыс кеңесін өткізді.Бұл туралы Еңбек министрлігінің баспасөз қызметі хабарлады.
Министрдің мәліметінше, атаулы әлеуметтік көмекті 291 мың отбасы немесе 1,4 миллион қазақстандық алады.Әлеуметтік көмек алатын адамдарға жұмсалатын жалпы сома 87 миллиард теңгені құрады. Сондай-ақ, Сапарбаев атаулы әлеуметтік көмек алушылардың 38%-ы Шымкент пен Түркістан облысында тұратынын атап өтті.
“Кейбір еңбекке жарамды азаматтары АӘК алғысы келеді, бірақ жұмыс істеуден бас тартады. Еңбекке қабілетті әлеуметтік көмек алушылармен міндетті түрде әлеуметтік келісім-шарттар жасасу керек, олар өз шеңберінде жұмысқа орналаса алады, жаңа мамандықтарға, бизнесті жүргізу негіздеріне оқытылады, гранттар мен жеңілдікті микрокредиттер беріледі. Масылдыққа жағдай жасауға болмайды, сондықтан тиісті өзгерістер Ережеге енгізіледі”, – деп атап өтті ол.
Еңбек министрі сондай-ақ атаулы әлеуметтік көмек төлеу кезінде ешқандай бұзушылықтарға жол беруге болмайтынын айтты.
“Біздің мамандар аймақтарды тексерді және бірқатар заң бұзушылықтарды анықтады, соның ішінде артық төлем, қос төлем төлеу бойынша, “Е-халық” АЖ өтінішсіз тіркеген,учаскелік комиссияның тексеруінсіз АЭК тағайындаған. Мысалы, меншігінде үш қабатты коттедждер мен автомобильдері бар адамдарға АӘК төленетін жағдайлар бар. Бұл – көзделген бюджет қаражатын заңсыз пайдалану. Әкімдіктер жергілікті жерлерде бақылауды күшейтуі керек”, – деп атап өтті ол.
Қазіргі уақытта Еңбек министрлігі әкімдермен және құқық қорғау органдарымен бірлесіп, бұзушылықтарды жоюмен, ұрланған қаражатты бюджетке қайтару және болашақта осындай жағдайлардың жолын кесумен айналысуда.
