Қазақстан Республикасы Еңбек министрлігінің басшысы Біржан Нұрымбетов Қазақстанда оралмандар мен қоныс аударушыларды қабылдаудың 2020 жылға арналған өңірлік квотасы бекітілген бұйрыққа қол қойды. Бұл туралы baigenews.kz ақпарат ресурсы хабарлайды.
Осы бұйрыққа сәйкес республикамызда оралмандарды қабылдаудың 2020 жылға арналған өңірлік квотасы 1378 адамды, ал қоныс аударушылар – 4750 адамды құрайды.
Еңбек министрі қол қойған бұйрық алғашқы ресми жарияланғаннан кейін, 10 күн өткен соң қолданысқа енгізіледі.
Еңбек министрлігінің ресми мәліметтеріне сәйкес, 1991 жылдан бастап бүгінгі күнге дейін бір миллионнан астам этникалық қазақ тарихи отанына оралып, оралман мәртебесін алды.
Өткен жылы Қазақстан Республикасына 17,7 мың этникалық қазақ оралды, олардың 2 мыңы қазіргі уақытта қабылдау аймақтарында, атап айтқанда Шығыс Қазақстан, Солтүстік Қазақстан, Ақмола, Павлодар және Қостанай облыстарында тұрып жатыр.
