Тәжікстан астанасында қазақстандық медицина күндерінің ашылуы өтті, оған денсаулық сақтау министрінің орынбасары Олжас Әбішев бастаған республикамыздың делегациясы қатысты. Бұл туралы ҚР Денсаулық сақтау министрлігінің баспасөз қызметі хабарлады.
Ведомствоның мәліметінше, Қазақстан делегациясы құрамына отандық медициналық жоғары оқу орындарының, бейінді медициналық және санаториялық-профилактикалық ұйымдардың, сондай-ақ медициналық орталықтардың өкілдері кірді.
Іс-шараға қатысушылар алдында сөз сөйлеген Олжас Әбішев қазақстандық денсаулық сақтау жүйесіндегі реформалар, оның басым бағыттары, және медицинаны цифрландыруға қатысты елімізде жүргізіліп жатқан жұмыстар туралы айтты.
Вице-министрдің айтуынша, денсаулық сақтауды цифрландырудың арқасында емханалардағы кезек айтарлықтай қысқарды және медициналық ұйымдар медициналық құжаттаманы қағазсыз жүргізуге көшті.
Тәжікстандағы қазақстандық Медицина күндерінің бағдарламасы туралы айтатын болсақ, ол өте мазмұнды болды. Атап айтқанда, шара аясында форум өтеді, онда қатысушылар денсаулық сақтау саласының өзекті мәселелерін талқылап, оны жетілдіру жөнінде пікір алмасады, сондай-ақ Қазақстан медицинасының жетістіктерінің көрмесі өтеді.
Сонымен қатар, әр түрлі шеберлік сыныптары, емделушілерді қарау және кеңес беру, көптеген пікірталастар өтеді. Іс-шара соңында медициналық ұйымдар мен еліміздің және Тәжікстанның жоғары оқу орындары арасында ынтымақтастық туралы 20-дан астам меморандумға қол қойылады деп жоспарлануда.
Сурет: inform.kz
