Әділ Тұрсынов Нұрсұлтан Назарбаевтың кеңесшісі болып тағайындалды, деп хабарлайды Ақорда сайты.
Хабарламада айтылғандай, Бірінші Президенттің шешімімен Тұрсынов Әділ Қапанұлы Бірінші президенттің кеңесшісі және Бірінші Президент Кеңсесінің Ақпараттық-талдау қамтамасыз ету бөлімінің меңгерушісі болып тағайындалды.
Әділ Тұрсынов 1973 жылы Алматыда дүниеге келген. 1994 жылы Қазақ мемлекеттік басқару академиясын, 2001 жылы – Сыртқы істер министрлігінің Дипломатиялық академиясын бітірген. 1994-2008 жылдары Сыртқы істер министрлігінде Үндістан мен Әзірбайжандағы елшіліктің хатшысы, Министрліктің дипломатиялық академиясының тыңдаушысы, Сингапурдағы кеңесші-елші болып жұмыс істеді. 2008 жылы Президент Әкімшілігінің Сыртқы саясат орталығы меңгерушісінің орынбасары болып тағайындалды. 2009-2016 жылдары СІМ Еуропа департаментінің директоры, Грузиядағы кеңесші-елші, СІМ Тәуелсіз Мемлекеттер Достастығы департаментінің директоры болды. 2016 жылдың мамыр айында Президенттің өкімімен Президент Әкімшілігінің Сыртқы саясат орталығының меңгерушісі болып тағайындалды. Орыс және ағылшын тілдерін біледі.
Сурет: akorda.kz
