Палата Спикері Нұрлан Нығматулиннің төрағалығымен өткен Мәжіліс Бюросының отырысында депутаттардың алдағы жалпы отырысының күн тәртібінің жобасы әзірленді.
Мәжіліс бірінші оқылымда “Қазақстан Республикасының Үкіметі туралы” Конституциялық заңға конституциялық түзетулер жобасын, сондай-ақ Мемлекет басшысының 2020 жылғы 1 қыркүйектегі “Қазақстан Жаңа нақты ахуалда: іс-қимыл уақыты”атты Қазақстан халқына Жолдауының жекелеген ережелерін іске асыру мәселесі бойынша бірқатар заңнамалық актілерге толықтыруларды талқылайды.
Палатаға туристік қызмет мәселелері, норма шығаруды жетілдіруге қатысты заңнамалық түзетулерді, сондай-ақ адвокаттық қызмет пен заң көмегіне қатысты депутаттық толықтыруларды бірінші оқылымда қарау ұсынылады.
Бірінші оқылымда ауыз сумен жабдықтауды субсидиялау жөніндегі орталық және жергілікті мемлекеттік органдар арасындағы өкілеттіктердің аражігін ажырату мәселелері бойынша депутаттар әзірлеген заңнамалық жаңалықтардың жобасы да талқыланбақ.
Пленарлық отырысқа дене шынықтыру мен спортқа қатысты заңнамалық түзетулер енгізілді.
Күн тәртібінің жобасында Мәжіліс депутаттары екінші оқылымда қарайтын экологиялық заң жобаларының үлкен пакеті бар. Бұл ілеспе түзетулері бар Экологиялық кодекстің жобасы. Бұл жерде ӘҚБтК-не, сондай-ақ Салық кодексіне және экология мәселелері бойынша оны қолданысқа енгізу туралы заңға толықтырулар енгізілді.
Екінші оқылымда Мәжіліс қоғамдық кеңестердің қызметі туралы заңнамалық новеллаларды, күзет қызметі мәселелері бойынша депутаттар әзірлеген заңнамалық түзетулерді, адамдарды Қазақстаннан тысқары жерлерге шығару кезінде ұстау мерзімдерін реттеуге қатысты, сондай-ақ бюджет заңнамасын жетілдіру туралы заңнамалық түзетулерді қарайды.
Палатаның жалпы отырысында бейінді комитетке Мәжіліске келіп түскен жаңа заң жобасы – “Қазақстан Республикасының дипломатиялық қызметі туралы”Заңға енгізілетін өзгерістер бойынша қорытынды дайындау мерзімін тағайындау қажет.
Сурет: zakon.kz
