ҚР Парламенті Мәжілісінің VII шақырылымының депутаты, жұмыс тобының жетекшісі Динара Закиева балалардың құқықтарын қорғауға қатысты заңнамаға ұсынылатын және талқыланатын түзетулер туралы айтты, деп хабарлайды “ҚазАқпарат” ХАА тілшісі.
“Талқыланған түзетулердің бірі буллинг – қудалау ұғымын енгізу. ҚР Президенті Қасым-Жомарт Кемелұлы Тоқаев 2021 жылғы қаңтарда VII шақырылған Парламенттің бірінші сессиясының ашылуында балалардың құқықтарын қорғау, олардың қауіпсіздігін қамтамасыз ету және буллингтің алдын алу мәселелерін шешу үшін шаралар қабылдау қажет екенін айтты”, — деді Динара Закиева ОКҚ-да өткен баспасөз конференциясында.
Ол сондай-ақ ҚР Президентінің 2020 жылғы қыркүйекте жарияланған Қазақстан халқына Жолдауында мемлекет басшысы кибербуллингтің алдын алу бойынша шаралар қабылдау қажеттігін ерекше атап өткенін еске салды.
“Білім беру мекемелеріндегі қудалау (буллинг) жағдайын талдау, сарапшы-психологтардың ұсыныстары, ата-аналар қоғамдастығының өтініштері мектепте және басқа да балалар мекемелерінде жалпы білім беру процесінде балаларға қатысты қудалаудың алдын алу және оған ден қою бойынша жүйелі шаралар қабылдаудың маңыздылығын көрсетті. Ұлттық қоғамдық денсаулық сақтау орталығының мәліметінше, елдегі оқушылардың 12%-дан астамы қудаланған. Бұл зерттеулер 2018 жылы жүргізілді”, — деп қорытындылады спикер.
