ҚР Парламентінің Сенаты ішкі көші-қон мәселелерін реттеу үшін шекара маңындағы аумақтарды дамытудың ұлттық жобасын әзірлеуді ұсынады.
«Парламент Сенаты парламенттік тыңдауларға қатысушылардың «жаһандану дәуіріндегі ұлттық құндылықтарды ілгерілету — кешенді жаңғыртудың негізі» тақырыбындағы ақпараты мен ұсыныстарын негізге ала отырып, Қазақстан Республикасының Үкіметіне (…) ішкі көші — қон және осы аумақтарда отандастарды қоныстандыруды қамтамасыз ету мәселелерін реттейтін шекара маңындағы аумақтарды дамытудың арнайы ұлттық жобасын әзірлеуді, оны Парламент қабырғасында талқылау мүмкіндігін қарауды ұсынады», — делінген Сенаттың ұсынымдарында.
Сонымен қатар, сенат үкіметке қазақ тілінің қоғамдағы рөлін күшейту және оның қолданылу аясын кеңейту мақсатында тіл саясаты жөніндегі қолданыстағы бағдарламалық құжаттарға өзгерістер мен толықтырулар енгізуді ұсынды, «олардың шеңберінде мынадай тиісті шаралар қабылдансын: мемлекеттік және квазимемлекеттік органдар мен мекемелерде, мектепке дейінгі білім беру мекемелерінде мемлекеттік тілді пайдалануды кеңейту, мемлекеттік тілді оқытуды жетілдіру, қазақ тілін ғылым мен технология тілі ретінде қалыптастыруға ықпал ететін сапалы оқулықтар дайындау және т.б.».
