Қазақстанда науқастар үшін дәрі-дәрмектерді уақытылы және толық жеткізбеу мәселесін депутаттар көтерді, деп «ҚазАқпарат»ХАА хабарлайды.
«Nur Otan» партиясының сайлауалды бағдарламасына сәйкес қазақстандықтардың денсаулығы басты басымдықтардың бірі болып табылады. Партия әр өңірде дәрі-дәрмектердің қажетті резервін қамтамасыз ету міндетін өз мойнына алды. Факт бойынша бізде не бар? Науқастар үшін өмірлік маңызы бар және сыни препараттарды жеткізудегі іркілістерге байланысты ауыр диагнозы бар пациенттердің шағымдары тоқтатылмайды», — деді Мәжіліс депутаты Ғалымжан Елеуов палатаның жалпы отырысында ҚР Денсаулық сақтау министрінің атына депутаттық сауал жолдаған кезде. Депутат бүгінде сәуір айының ортасы екенін, алайда дәрілік заттар тізімінен 70-ке жуық позиция әлі сатып алынбағанын қосты. Осы 70 позицияға қосымша, тағы 45 позиция бойынша, сатып алынған сияқты, алғашқы жеткізудің басталу мерзімі сәуірден, ал кейбір препараттардан — ағымдағы жылдың қазанынан басталады. Ал өткен жылдың 28 шілдесінде Денсаулық сақтау министрлігінің бұйрығымен 21 жылға Бірыңғай дистрибьютор сатып алатын ТМККК және МӘМС шеңберіндегі дәрілік заттардың тізімі бекітілді. «Яғни, 21 жылдың басына дейін халықты тегін дәрі-дәрмекпен қамтамасыз ету міндеті белгіленген болатын. Алайда, СК-Фармация деректері бойынша, менің ресми сұрауларыма алынған онкологиялық науқастарға арналған L-аспарагиназа, Винбластин, Денозумаб, Метотрексат, Циклофосфамид сияқты ісікке қарсы препараттар сатып алынған жоқ», — деп нақтылады Ғалымжан Елеуов. Оның айтуынша, «Тамоксифенді» уақтылы жеткізбеу бар. «Пациенттер бұл препаратты 1 тоқсан бойы күтті, бірақ ол тек сәуір айында келді. «Анастазол» және «Интерферон альфа», «онко-БЦЖ»препараттары толық көлемде келмеді. Ал бүгінгі таңда 180 мыңнан астам қазақстандық онкологиялық ауруханаларда есепте тұр. Жыл сайын елімізде 30 мыңнан астам жаңа жағдай анықталады. Онкологиялық науқастарды дәрімен қамтамасыз етуді кешіктіру тіпті 10 күнде қайтымсыз салдарға әкеледі», — деп атап өтті Ғалымжан Елеуов. Туберкулезбен ауыратын науқастар да дәрілік қолдаумен қиындық көріп отырғаны атап өтілді – монопрепараттар: Изониазид, Протионамид, Рифампицин бойынша жеткізілімдер жоқ; жаңа буын препараттары жоқ: Бедаквилин, Деламинид, Клофазамид.
