Қазақстан Денсаулық сақтау министрлігінде Елжан Біртановтың міндетін, бұрын жоспарланғандай үш адам емес, бір адам атқаратын болады деп шешім қабылданды. Бұл туралы ведомствоның ресми өкілі Диас Ахметшарип мәлімдеді.
Оның айтуынша, коронавирустық инфекциядан емделіп жатқан Денсаулық сақтау министрлігі басшысының міндетін атқарушы оның орынбасары Ләззат Ақтаева болады.
Бұрынырақ Диас Ахметшарип Денсаулық сақтау министрі коронавирустан емделіп жатқан кезде, оның міндетін вице-министрлер Олжас Әбішев, Ләззат Ақтаева және Людмила Бюрабекова кезекпен атқаратынын айтқан.
“Елжан Біртанов толық сауығып, жұмысқа қайта оралғанға дейін, олар кестеге сәйкес, күн ара министрдің міндетін уақытша атқарады”, – деді Денсаулық сақтау министрлігінің өкілі.
Ағымдағы жылдың 14 маусымында Елжан Біртанов COVID-19 тестінен өткеннен кейін, оның диагнозы расталғанын мәлім болды, сондықтан ол қазір барлық қажетті емдеу процедураларын алу үшін инфекциялық стационарға жатқызылды.
Осыдан кейін премьер-министр Асқар Мамин, Ауыл шаруашылығы министрлігінің басшысы Сапархан Омаров және Жамбыл облысының әкімі Бердібек Сапарбаев, сондай-ақ Білім және экология министрлері Асхат Аймағамбетов пен Мағзұм Мырзағалиев өзін-өзі оқшаулау режиміне көшті.
Сурет: inbusiness.kz
