Бүкіл адамзат үшін қатерге айналған коронавирус індетінің басталуымен біздің еліміз білікті эпидемиологтардың тапшылығына тап болды. Бұл мәселе қалай шешіліп жатқаны туралы Денсаулық сақтау министрлігі хабарлады, деп жазады newtimes.kz ақпарат ресурсы.
Денсаулық сақтау министрлігі, COVID-19 індетіне байланысты, медициналық оқытудың барлық деңгейлерінде пәндердің санитарлық-гигиеналық құрамы күшейтілгенін айтты. Сонымен қатар, «Эпидемиология» және «Гигиена» мамандықтары бойынша қосымша бейінді магистратура бағдарламалары әзірленді.
Сондай-ақ, ведомство осы жылдың басынан бері 60 мыңнан астам дәрігерге коронавирустық инфекцияға байланысты қысқа мерзімді курстар өткізілгенін айтты.
«Республикалық бюджет аясында 15 мыңнан астам медицина қызметкері оқытылды, оның ішінде инфекциялық аурулардың эпидемиологиясы, инфекциялық емес аурулардың алдын алу және тиімді емдеу курстары бойынша 8 мыңнан астам адам, сондай-ақ қайта даярлау қорытындысы бойынша 150 эпидемиолог, 100 инфекционист және 165 жедел шұғыл медициналық көмек дәрігері толықтырылады», — деп мәлімдеді ведомствода.
COVID-19-дың таралуының басынан бастап бүгінгі күнге дейін Қазақстан Республикасында ресми түрде жұқтырудың 193966 жағдайы тіркелді. Вирустан 174880 адам айықты.
