Қазақстан Республикасы Денсаулық сақтау министрлігінің ресми өкілі Бағдат Қожахметов азаматтар коронавирустық инфекцияға қарсы вакцинаны тегін алатынын мәлімдеді, деп хабарлайды «ҚазТАГ» ақпараттық ресурсы.
Бағдат Қожахметовтың айтуынша, Денсаулық сақтау министрлігі екі миллионнан астам азаматты коронавирусқа қарсы вакцинамен тегін қамтамасыз етуді жоспарлап отыр.
Алайда, Денсаулық сақтау министрлігінің COVID-19-ға қарсы тегін вакцинацияны кім талап ете алатынын ресми өкілі айтқан жоқ.
Осы жылдың қыркүйек айында Қазақстанда Биологиялық қауіпсіздік ғылыми-зерттеу институтының ғалымдары әзірлеген коронавирусқа қарсы отандық препараттың клиникалық сынақтарын бастау жоспарлануда.
Covid-19-ға қарсы қазақстандық вакцинаның клиникалық зерттеулерін Ресейдегі сияқты, атап айтқанда стандартты төрт фазаның орнына, екі фазада жүргізу жоспарланып отыр.
Ресми мәліметтерге сәйкес, Қазақстанда коронавирустық инфекцияны жұқтыру жағдайларының саны 95942, сонымен бірге елімізде COVID-19 белгілері бар пневмонияның 9584 жағдайы тіркелді.
Сурет: total.kz
