Қазақстан Республикасының Бас санитарлық дәрігері Жандарбек Бекшин коронавирустық инфекцияның таралуына байланысты жағдайға түсініктеме берді. Бұл туралы Денсаулық сақтау министрлігінің баспасөз қызметі хабарлайды.
Жандарбек Бекшин қазір Қазақстан денсаулық сақтау министрлігі вирустың Қытайдан тыс жерлерде таралуын тұрақты түрде қадағалап отырғанын айтты.
Бас сандәрігер соңғы уақытта шет елдерде Қытай вирусын жұқтыру жағдайларының айтарлықтай өскені байқалатынын және бұл Қазақстан денсаулық сақтау министрлігінде белгілі бір алаңдаушылық туғызатынын атап өтті.
“Осыған байланысты, біз бұл елдерге өте ерекше көңіл бөлудеміз. Бірінші кезекте, мен азаматтарымыздың назарын Оңтүстік Кореяға аударғым келеді, бүгінгі таңда ресми мәліметтер бойынша, вирус жұқтырған 602 адам тіркелген, ал бір тәулікте 168 адамға көбейген, бұл өте маңызды көрсеткіш”, – деді ол.
Бекшин ауру деңгейінің өсуі Италияда – 144 жағдайы, Жапонияда – 132 жағдайы, Сингапурда – 89 жағдайы, Иранда – 49 жағдайы, Таиландта – 35 жағдайы және Малайзияда – 22 жағдайы байқалғанын айтып өтті.
Осыған байланысты Қазақстан Денсаулық сақтау министрлігі біздің еліміздің азаматтарын коронавирусты жұқтыру жағдайлары тіркелген мемлекеттерге барудан бас тартуға шақырады.
Сурет: zakon.kz
