Шанхай Ынтымақтастық Ұйымы елдерінің Денсаулық сақтау министрлерінің бейнеконференция байланысы арқылы өткен мәжілісінде Қазақстан Денсаулық сақтау министрі Алексей Цой жақын арада біздің республикамызда COVID-19 бойынша статистика өзгеретінін айтты, деп хабарлайды «ҚазАқпарат» жаңалықтар ресурсы.
Алексей Цойдың айтуынша, Қазақстандағы статистикалық мәліметтердің барынша ашықтығын қамтамасыз ету мақсатында коронавирус пен пневмония статистикаларын біріктіру шешімі қабылданды.
«Осылайша, COVID-19-дың зертханалық расталған жағдайлары ПТР-тестің теріс нәтижелі пневмония, бірақ COVID-19-дың клиникалық және эпидемиологиялық белгілері бар жағдайларымен біріктіріледі», — деп түсіндірді министр.
Денсаулық сақтау министрлігінің басшысы біздің республикамызда аурудың халықаралық жіктемесінің жаңа кодтарын пайдалана отырып, кодтауға толық көшу 1 тамыздан бастау жоспарланып отырғанын атап өтті.
ШЫҰ елдері әріптестеріне коронавирус бойынша қазақстандық статистиканың өзгеруі туралы айта отыра, Алексей Цой оларды статистикалық деректердің жаңа есебіне көшуге шақырды.
Цой осының арқасында коронавирус ауруының болжамын дұрыс жасауға және індеттің таралуына қарсы күресте қажетті ресурстарды сәйкес жоспарлауға болатынын атап өтті.
Сурет: topspb.tv
