Орталық коммуникациялар қызметінде өткен брифингте еліміздің Денсаулық сақтау министрі Алексей Цой өз орынбасары Олжас Әбішевтің ұсталғаны туралы түсінік берді. Бұл туралы nur.kz ақпарат агенттігі хабарлайды.
Баспасөз мәслихаты барысында журналистер Әбішев ұсталған кезде Денсаулық сақтау министрлігінде жұмыс істегені-істемегені, қанша сомаға ұрлық жасағаны туралы сұрақтар қойды. Ведомство басшысы, өз кезегінде, өткен аптада оның орынбасары өз еркімен кету туралы өтініш жазғанын айтты.
Сонымен қатар, Цой Олжас Әбішевті қызметінен босату туралы шешім әлі қабылданбағанын атап өтті.
Денсаулық сақтау вице-министрі ұрлаған қаражаттың мөлшері туралы айта отырып, Алексей Цой сотқа дейінгі тергеу жүргізіліп жатқандықтан, бұл ақпараттан хабардар емес екенін айтты.
Денсаулық сақтау министрі бұл туралы жаңа ақпарат пайда болған жағдайда, уәкілетті органдар оны бірден жариялайтынын атап өтті.
Қазақстанның денсаулық сақтау министрінің орынбасары Олжас Әбішевтің ұсталғаны туралы бұған дейін Қаржы министрлігі жанындағы Қаржы мониторингі комитетінің өкілдері хабарлаған болатын. Сондай-ақ, ведомствода шенеунікке қатысты бюджет қаражатын жымқырды деген күдікпен қылмыстық іс ашылғанын және сотқа дейінгі тергеудің барлық қажетті рәсімдері жүргізіліп жатқанын айтты.
Сурет: baigenews.kz
