БАҚ-та Алматы облысындағы №2 емханада вакциналаудан бас тартқан медицина қызметкерлерін жұмыстан босату қаупі төніп тұрғаны туралы ақпарат пайда болды. Бұл туралы zakon.kz жаңалықтар порталы хабарлайды.
Exclusive.kz ақпараттық басылымның деректері бойынша емхана қызметкерлері бір медбике иммунизациядан кейін ауырып, есінен танып қалғаннан кейін, коронавирусқа қарсы ресейлік “Спутник V” вакцинасынан бас тарта бастаған.
БАҚ мәлімдемелеріне облыстық денсаулық сақтау басқармасы түсініктеме берді. Олардың айтуынша, вакцина алушылардың алғашқы тізімінде №2 емхана жоқ.
“Сәйкесінше, COVID 19-ға қарсы вакциналаудан бас тартуға байланысты қызметкерлерді жұмыстан босату қаупі болған жоқ және болмайды да!”- деп қосты ведомствода.
Сондай-ақ, Денсаулық сақтау басқармасы “Спутник V” медициналық препаратын қолданғаннан кейін, медбикенің қысымы көтерілгенін айтты. Ол Талдықорған қалалық ауруханасына жеткізіліп, бір сағаттай дәрігерлердің қадағалауында болды. Түстен кейін өзін жақсы сезініп, нәтижесінде ол облыстық ауруханаға жұмысына босатылды. Қазіргі уақытта әйел жұмысын жалғастырып жатыр, өзін сезінуі қанағаттанарлық.
“Кешегі оқиғаға байланысты, вакцина алуға жіберілген медицина қызметкерлерінің ешқайсысы (қарсы көрсетілімдері жоқ) COVID 19-ға қарсы екпе алудан бас тартқан жоқ. Вакциналау бекітілген жоспарға сәйкес жүргізілуде”, – деп қорытындылады ведомствода.
Сурет: u-f.ru
