Чехия парламенті депутаттары палатасы төрағасының орынбасары Войтех Филип Еуразия елдері парламенттері спикерлерінің төртінші кеңесінде оның елі Қазақстанды Орталық Азиядағы негізгі саяси және экономикалық серіктес ретінде қарастыратынын мәлімдеді.
«Чехия парламенті 2016 жылдың қазан айында Қазақстан мен Еуропалық Одақ арасындағы кеңейтілген әріптестік, ынтымақтастық туралы келісімді ратификациялаған ЕО елдеріндегі ең алғашқылардың бірі болды», — деді Чехия депутаттар палатасының вице-спикері.
Сондай-ақ кеңес барысында Войтех Филип осы жылдың қазан айында Чехия Республикасы парламенті депутаттары палатасының спикері Радек Вондрачек елімізге ресми сапармен келетінін хабарлады. Оның айтуынша, бұл сапар Қазақстан мен Чехия арасындағы парламентаралық ынтымақтастықты нығайтады.
Сонымен қатар, Чехия депутаттары палатасы төрағасының орынбасары бүгінгі таңда парламентаралық байланыстар тетіктері жаңа жаһандық қауіп-қатерлерге, сондай-ақ лаңкестікке, экстремизмге және ксенофобияға қарсы тұру үшін қажет екенін атап өтті.
«Көпжақты парламентаралық ынтымақтастық мемлекет пен халық арасындағы өзара түсіністікті қамтиды және диалог үшін қолайлы жағдай жасайды. Осыған байланысты, бүгін біз жаһандық тұрақты дамыту мақсатында халықаралық және өңірлік тұрақтылыққа қолайлы жағдай жасау үшін көпжақты ынтымақтастықтың маңыздылығын мойындай аламыз», — деп толықтырды Войтех Филип.
