Қазақстан Республикасынан тыс жерге тұрақты тұру үшін құжаттарын ресімдеген адамдар ҚР БЖЗҚ-дан зейнетақы жинақтарын ала алады, деп хабарлайды zakon.kz Polisia.kz-ға сілтеме жасай отырып.
Қолданыстағы заңнамаға сәйкес адамның елден тыс жерлерге жеке шығуы немесе басқа мемлекеттің азаматтығын алуы оның заңды мәртебесін – Қазақстаннан тыс жерлерге тұрақты тұруға кетуін автоматты түрде белгілемейді. Тұрақты тұруға кету көші-қон полициясы органдарына жүгінген кезде, кетуге арналған құжаттар ресімделгеннен кейін ғана жүзеге асырылады.
Қазақстан Республикасынан тыс жерлерге шығуға құжаттарды ресімдеу мәселелері бойынша азаматтар өтініш білдіргенде, көші-қон қызметі адамдардың тұрақты тұруға кетуге рұқсат бермеу себептерінің жоқтығын тексереді. Яғни, салықтық, алименттік және өзге де берешек, әкімшілік айыппұлдар тексеріледі, адамның заң қорғайтын қандай да бір құпия мәліметтері бар ма, сот жүктеген міндеттемелерді орындаудан жалтарып жүр ме, қылмыс жасап сотталды ма, мерзімді әскери қызмет өткеруде ме, не азаматтық сот ісін жүргізуде жауапкер болып табылады ма.
Қазақстан аумағында тұрып, басқа мемлекеттің азаматтығын алатын жағдайлар да бар. Осыған байланысты Қазақстанның бұрынғы азаматтары, Қазақстан Республикасының азаматтығы жойылғандар ретінде, бірінші кезекте, шетелдік ретінде қайта тіркелуі қажет. Шетелдік ретінде тіркеліп, тұруға ықтиярхат алғаннан кейін ғана тұрақты тұруға кету үшін құжаттарды ресімдейді. Содан кейін олар өздерінің зейнетақы жинақтарын алу үшін БЖЗҚ-ға жүгіне алады.
