Қырғыз Республикасының Парламенті Садыр Жапаровты Үкімет басшысы лауазымына қайта бекітті, ал президент Сооронбай Жээнбеков тиісті Жарлыққа қол қойды, деп хабарлайды zakon.kz жаңалықтар ресурсы.
Жапаров алғаш рет 10 қазанда көрші Қырғызстанның премьер-министрі қызметіне Парламент бекіткен. Алайда, заңгерлер оның сайлануының заңдылығына күмән келтірді, өйткені бірнеше депутат кворумды бұзып, Парламент отырысынан шығып кетіп, елде болып жатқан жағдайға наразылығын білдірді.
Осыдан кейін Жээнбеков Жапаровты министрлер кабинетінің басшысы қызметіне қайта тағайындау туралы қаулыны Жогорку Кенешке жіберіп, Қырғызстандағы тұрақтылық үшін барлық қабылданған шешімдер заңды болуы және ешқандай күмән тудырмауы тиіс екенін мәлімдеді.
Садыр Жапаров үстіміздегі жылдың 6 қазанында Бішкектегі жаппай наразылықтар барысында түрмнден босатылды. Қазіргі премьер 2013 жылы “Кумтор” алтын кен орнын ұлттандыру үшін митинг ұйымдастырып, оның барысында Ыстықкөл облысының бұрынғы әкімін кепілге алғаны үшін жазасын өтеп жатқан болатын. Осы қылмыстары үшін сот оны 11,5 жылға бас бостандығынан айырған.
Сурет: ria.ru
